上海虹口区有个地方叫“大柏树”，迭个地方是个交通要道，北通吴淞，东到五角场，朝西南通到虹口足球场。实际浪向迭个地方并呒没长得大来死个柏树，葛末为啥道理要叫“大柏树”呢？
“大柏树”本生【sang】勿叫大柏树，老里八早个辰光，伊叫“大八寺”。垃拉上海闲话里，大柏树、大八寺读起来是一样个，写起来勿一样，意思也勿一样。五十年前，我垃拉复旦大学读书，每个礼拜回屋里侪要经过大八寺，迭个地方周围侪是农田、农舍，从来呒没看见过啥个寺，“大八寺”实际浪向搭寺庙混身勿搭界。乃末又滑稽了，“大八寺”搿个地方既然呒没寺，又哪能会得叫“大八寺”个呢？
“大八寺”地名个来历搭抗战有关系。1931年9月18日，垃拉沈阳发生了九·一八事变。1932年1月28日，上海虹口日租界的日军（阿拉小辰光，大人叫日本人“东洋人”，叫日本兵“东洋兵”）悍然进攻闸北，天通庵路一带成了一片火海，中国驻军第十九路军在总指挥蒋光鼐、军长蔡廷锴个指挥下奋起抵抗，迭个就是历史浪向老有名个一·二八抗战。搿歇辰光，上海老百姓侪到前线慰问抗日将士。日本侵略军攻来攻去就是攻不下十九路军个防线，只好调集援军垃拉江苏太仓浏河口登陆，朝上海市区推进，并占据了现在称作“大柏树”个交通要津。当时辰光，搿个地方呒没名字个，东洋人根据伊个地理位置，搭伊起了个名字叫“大八辻”。迭个“辻”字是日本汉字，读【tsuji沪音：子期】，意思是“十字路口”，阿拉中国呒没迭个字个（早期个《现代汉语词典》勿收迭个字，到2002增补本才收）。侬看，逸仙路搭仔中山北一路（当时辰光叫西体育会路）、邯郸路搭仔中山北一路阿像两个老大的“八”字？上海人再根据“大八辻”个上海闲话读音，记作“大八寺”。搿能一来，迭个呒没寺个交通要津就好像有了一个寺叫“大八寺”了。
1983年，有一位老人写信拨垃有关部门，提起搿桩往事。老人讲，大八寺迭个地名留有东洋兵侵略上海个痕迹，建议改名。有关部门接受了迭个建议，拿“大八寺”改为垃拉上海闲话里同音个“大柏树”,从此以后，“大柏树”就一直喊到现在。所以讲，“大柏树”搭长得大来死个柏树一眼也呒没关系个。